Gjennomføringsplan for å setje i drift nytt anlegg

Arbeidet med utvidinga av kapasiteten ved Tyinkrysset reinseanlegg nærmar seg no sluttfasen. Arbeidet som kan utførast utan å påverke drifta av anlegget blir sluttført før påska 2025. Det arbeidet som påverkar drifta vil bli påbegynt etter påska.  Arbeidet etter påska fører til ein total driftsstans på anlegget, og omfattar utskifting av eksisterande styringssystem og ein del røyrsamanføyiningar.  Arbeidet vil finne stad frå og med veke 18 til og med veke 22 og inneheld fleire fasar med ulik moglegheit til å drifte anlegget. Vedlagt ligg gjennomføringsplanen for dette. Frå og med veke 23 skal arbeidet vere sluttført og anlegget vere i normal drift. Det er avtalt prøvedriftsperiode med leverandør. Den er forlenga for å inkludere belastning i jula 2025. Prøvedrift er ei forsikring opp mot leverandør om at anlegget som er levert er i samsvar med bestillinga. Oppdraget blir ikkje sluttfakturert før etter prøvedriftsperioda. 

Tidspunkt for nye tilkoplingar

Kravet i plan og bygningsloven §27-2 seier at før oppføring av bygning blir godkjent, skal avløpsvatn vere sikra og i samsvar med forurensingsloven. Kommunen har ikkje hatt høve til å gje byggeløyve med vilkår i byggeløyvet om at tilkopling til offentleg avløpsvatn og innflytting i bygningen ikkje skjer før det offentlege avløpsanlegget tilfredsstiller krava etter forurensingslova. 

Administrasjonen vurderer at anlegget, når det er sett i drift i veke 23, vil vere i normal drift og i samsvar med forurensingslova. Det blir difor vurdert at me frå 1. juni kan opne opp for å gje byggeløyver for byggetiltak på Tyinkrysset, dette føreset at andre forhold er avklara og i orden for den spesifikke byggesaka. Den avtala prøveperioden fram til og med 31. desember sikrar at barnesjukdommar ved anlegget blir fanga opp og retta av leverandør. Administrasjonen har vurdert risikoen ved å tilkoble nye abonnentar til reinseanlegget i perioda med prøvedrift, og vurdert til at det ikkje er risiko av betydning ved å gje byggeløyve frå 1. juni. Sjå vedlagte risikovurdering.

Saksbehandlingstid for byggesaker er 3 – 12 veker avhengig av type søknad. Administrasjonen vil oppmode om å kome tidleg i kontakt med kommunen og søke slik at ein kan vere mest mogleg klar til 1. juni. Send gjerne søknad allereie no.

Gjennomføringsplan for utvidelse Tyinkrysset reinseanlegg.pdf (PDF, 82 kB)

Risikoanalyse_tilkobling av nye abonnentar Tyinkrysset reinseanlegg.pdf (PDF, 222 kB)